გორის მერმა მსოფლიო ჩემპიონს 50 წლის იუბილე მიულოცა
გორის მუნიციპალიტეტის მერმა ვლადიმერ ხინჩეგაშვილმა მსოფლიოსა და ევროპის ჩემპიონს სამბოში - სოსო ახალბედაშვილს 50 წლის იუბილე მიულოცა.
სოსო ახალბედაშვილი გორის საჭიდაო დარბაზის წარმომადგენელია. ის 90 - იან წლებში სამბოში ასპარეზობდა ცნობილი მწვრთნელის გივი ზაუტაშვილის ხელმძღვანელობით.
მან ჯერ საქართველოს მასშტაბით შეძლო წარმატებების მოპოვება და ადგილი დაიმკვიდრა საქართველოს ნაკრებში, რის შემდეგაც საერთაშორისო არენაზეც გამოიჩინა თავი.
ამჟამად, ახალბედაშვილი გორის შოთა ჩოჩიშვილის სახელობის კომპლექსურ სპორტულ სკოლაში მწვრთნელის რანგში თავის გამოცდილებას პატარა სპორტსმენებს უზიარებს.
სოსო ახალბედაშვილი არის მსოფლიოს ჩემპიონი (1997) და ორგზის პრიზიორი, აგრეთვე ევროპის ჩემპიონი (1998) და სამგზის პრიზიორი.
