გორში, ქალაქის ცენტრალურ გამზირზე კორპუსის ფასადზე ორი ახალი მონუმენტური "სტრიტარტი" იქმნება.
„ქუჩის ხელოვნება“ ასე ჰქვია პროექტს, რომლის ფარგლებშიც თანამედროვე ვიზუალური ხელოვნების ნამუშევრებით სტალინის გამზირზე #2/ა - ში არსებული კორპუსის ფასადის ნაწილი (500 კვადრატული მეტრი) დაიტვირთება.
კორპუსის სამხრეთ ფასადზე განთავსდება „ქართული სუფრა“. ნახატზე გამოყენებული იქნება გორის ეთნოგრაფიულ მუზეუმში დაცული ქართული სუფრის ორნამენტები, რაც ტრადიციული ხელოვნების მეტი პოპულარიზაციისთვის მნიშვნელოვანია.
ჩრდილოეთ ფასადზე დაგეგმილია გორში დაბადებული ცნობილი ქართველი ფილოსოფოსის მერაბ მამარდაშვილის პორტრეტის მოხატვა.
ინიციატივის მიზანია ქუჩის ხელოვნების პოპულარიზაცია, ქალაქში არსებული ფასადებისთვის საინტერესო იერსახის მიცემა და ტურისტებისთვის მიმზიდველი ახალი ადგილების შექმნა.
პროექტი გორის მუნიციპალიტეტის მერიის „კულტურული ღონისძიებების პროექტების ხელშეწყობისა და თანადაფინანსების პროგრამის“ ფარგლებში ფინანსდება.
"სტრიტარტი" "გორელ ფოტოგრაფთა კლუბის" საავტორო პროექტია.
